ధర్మవరం, ఆగస్టు 7 (మీకోసం న్యూస్): రాష్ట్ర ప్రభుత్వం జాతీయ చేనేత దినోత్సవాన్ని పురస్కరించుకుని అమలు చేస్తున్న 'నేతన్న సాయం' పథకం ధర్మవరం చేనేత కార్మికుల కుటుంబాల్లో ఆనందాన్ని నింపింది. ఒక్కో అర్హ కుటుంబానికి రూ.25 వేల ఆర్థిక సాయం అందించాలనే ప్రభుత్వ నిర్ణయానికి అనుగుణంగా తొలుత విధించిన అర్హత నిబంధనల కారణంగా వేలాది మంది నిజమైన చేనేత కార్మికులు లబ్ధికి దూరమయ్యే పరిస్థితి ఏర్పడగా, ధర్మవరం నియోజకవర్గ టీడీపీ ఇన్చార్జి పరిటాల శ్రీరామ్ ప్రత్యేక చొరవ తీసుకుని ప్రభుత్వం దృష్టికి సమస్యను తీసుకెళ్లడంతో పరిస్థితి మారిందని స్థానిక చేనేత వర్గాలు పేర్కొంటున్నాయి.
ప్రభుత్వం తొలిదశలో 200 యూనిట్ల విద్యుత్ రాయితీ పొందుతున్న చేనేత కార్మికులకే పథకాన్ని పరిమితం చేయడంతో ధర్మవరం పట్టణంలోని అనేక మంది నిజమైన చేనేత కార్మికులు ఆందోళన వ్యక్తం చేశారు. ఈ విషయాన్ని తెలుసుకున్న పరిటాల శ్రీరామ్ వెంటనే చేనేత కార్మికులు, సంఘాల ప్రతినిధులు, స్థానిక నాయకులతో సమావేశమై వారి సమస్యలను వివరంగా తెలుసుకున్నారు. పథకం అమలులో ఉన్న లోటుపాట్లను గుర్తించి సంబంధిత అధికారులకు నివేదించడంతో పాటు ప్రభుత్వ పెద్దల దృష్టికి తీసుకెళ్లేందుకు చర్యలు ప్రారంభించారు.
ధర్మవరం చేనేత రంగానికి ప్రత్యేక గుర్తింపు ఉందని, పట్టణంలో సుమారు 3 వేల నుంచి 5 వేల వరకు చేనేత కుటుంబాలు జీవనోపాధిగా ఈ వృత్తిపైనే ఆధారపడుతున్నాయని ఆయన ప్రభుత్వానికి వివరించినట్లు సమాచారం. ప్రస్తుతం అమల్లో ఉన్న అర్హత నిబంధనల వల్ల నిజమైన చేనేత కార్మికులు నష్టపోతారని, అర్హుల పరిధిని విస్తరించాలని ఆయన విజ్ఞప్తి చేసినట్లు తెలిపారు.
ఈ అంశాన్ని రాష్ట్ర చేనేత శాఖ మంత్రి సవితమ్మ దృష్టికి తీసుకెళ్లడంతో పాటు చేనేత శాఖ ఉన్నతాధికారులు, రాష్ట్ర ముఖ్యమంత్రి నారా చంద్రబాబు నాయుడు దృష్టికి కూడా తీసుకెళ్లినట్లు పార్టీ వర్గాలు తెలిపాయి. ధర్మవరం చేనేత కార్మికులందరికీ పథకం ప్రయోజనం అందేలా అవసరమైన అదనపు నిధులను కేటాయించాలని, అర్హత నిబంధనలను సడలించాలని ఆయన కోరినట్లు వెల్లడించారు.
పథకం అమలుకు చాలా తక్కువ సమయం మాత్రమే ఉండటంతో పరిటాల శ్రీరామ్ స్వయంగా అధికారులతో నిరంతరం సంప్రదింపులు జరుపుతూ, చేనేత సంఘాల నాయకులతో సమన్వయం చేస్తూ అర్హుల జాబితాను రూపొందించే ప్రక్రియ వేగవంతం చేయడానికి కృషి చేసినట్లు పార్టీ నాయకులు తెలిపారు. నిజమైన చేనేత కార్మికులు ఎవరూ నష్టపోకుండా చూడాలనే లక్ష్యంతో ఆయన అహర్నిశలు శ్రమించారని పేర్కొన్నారు.
ఈ కృషి ఫలితంగానే ప్రస్తుతం ధర్మవరం పట్టణంలోని వేలాది చేనేత కార్మికుల కుటుంబాల ఖాతాల్లో రూ.25 వేల చొప్పున ఆర్థిక సాయం జమ అవుతుండటంతో లబ్ధిదారులు ఆనందం వ్యక్తం చేస్తున్నారు. ప్రభుత్వం అందించిన ఈ సహాయం తమ కుటుంబాలకు ఎంతో ఊరటనిచ్చిందని పలువురు చేనేత కార్మికులు పేర్కొంటున్నారు.
చేనేత వృత్తిని పరిరక్షించడంలో, కార్మికుల సంక్షేమానికి అండగా నిలవడంలో పరిటాల శ్రీరామ్ కీలక పాత్ర పోషించారని లబ్ధిదారులు అభినందిస్తున్నారు. సమస్యను వెంటనే గుర్తించి ప్రభుత్వ దృష్టికి తీసుకెళ్లడంతో పాటు అధికారులతో నిరంతరం సమన్వయం చేస్తూ తమకు న్యాయం జరిగేలా కృషి చేశారని వారు తెలిపారు. ఈ సందర్భంగా ఆయనకు కృతజ్ఞతలు తెలియజేస్తూ పథకం వల్ల తమ కుటుంబాలకు ఆర్థిక భరోసా లభించిందని పేర్కొన్నారు.
ధర్మవరం చేనేత రంగం రాష్ట్రంలో ప్రత్యేక స్థానాన్ని కలిగి ఉండగా, చేనేత కుటుంబాల సంక్షేమానికి ప్రభుత్వం చేపడుతున్న చర్యలు మరింత విస్తృతంగా కొనసాగాలని చేనేత కార్మికులు కోరుతున్నారు. భవిష్యత్తులో కూడా అర్హులైన ప్రతి చేనేత కుటుంబానికి సంక్షేమ పథకాల ప్రయోజనాలు అందేలా ప్రభుత్వం చర్యలు తీసుకోవాలని విజ్ఞప్తి చేస్తున్నారు.
0 కామెంట్లు