మీకోసం న్యూస్, పెనుకొండ, ఆగస్ట్ 17: పెనుకొండ: పెనుకొండ డివిజన్లోని పట్టు రైతులకు వాతావరణ పరిస్థితులకు అనుగుణంగా సాంకేతిక సూచనలు అందిస్తూ, సీడ్ గుడ్ల ఉత్పత్తి, పట్టుగూళ్ల ఉత్పత్తి, నాణ్యత పెంపునకు అవసరమైన మెలకువలను తెలియజేసి రైతులకు అత్యుత్తమ సేవలు అందించిన పట్టు పరిశ్రమ శాఖ అసిస్టెంట్ డైరెక్టర్ దాసరి ఓబులేసుకు ఘన సత్కారం లభించింది.
80వ స్వాతంత్ర్య దినోత్సవ వేడుకల సందర్భంగా పట్టు పరిశ్రమ రంగంలో ఆయన అందించిన విశేష సేవలను గుర్తించి, రాష్ట్ర బీసీ సంక్షేమం, చేనేత మరియు జవళి శాఖ మంత్రి శ్రీమతి ఎస్. సవితమ్మ చేతుల మీదుగా ఉత్తమ అధికారిగా ప్రశంసా ప్రతిభా పురస్కారం అందుకున్నారు.
పెనుకొండ డివిజన్లో పట్టు రైతుల అభివృద్ధికి దాసరి ఓబులేసు ప్రత్యేక శ్రద్ధ చూపుతున్నారని దళిత సంఘాల నాయకులు, కూటమి నాయకులు కొనియాడారు. వాతావరణ మార్పులకు అనుగుణంగా పట్టు రైతులు తీసుకోవాల్సిన జాగ్రత్తలు, సాంకేతిక పరిజ్ఞానం, సీడ్ గుడ్ల ఉత్పత్తిలో పాటించాల్సిన విధానాలు, పట్టుగూళ్ల నాణ్యత పెంపునకు అవసరమైన చర్యలపై రైతులకు ఎప్పటికప్పుడు అవగాహన కల్పిస్తున్నారని తెలిపారు.
పట్టు ఉత్పత్తిలో పెనుకొండ డివిజన్ను అగ్రగామిగా నిలిపేందుకు ఆయన చేస్తున్న కృషి అభినందనీయమన్నారు. రైతులకు అందుబాటులో ఉంటూ వారి సమస్యలను పరిష్కరించేందుకు కృషి చేయడంతో పాటు, పట్టు పరిశ్రమ అభివృద్ధికి సాంకేతిక మార్గదర్శకత్వం అందిస్తున్నారని పేర్కొన్నారు.
ఈ సందర్భంగా ఎం. పెద్దన్న (ఎంఆర్పీఎస్ రాయలసీమ జిల్లాల కన్వీనర్), టి. రామాంజనేయులు (ఎమ్మార్పీఎస్ రాష్ట్ర కార్యదర్శి), ఏనుముల రామకృష్ణ (మాజీ సర్పంచ్), బీజేపీ అనంతపురం జిల్లా ఇన్చార్జి ఎం.ఎన్. మూర్తి, దళిత సంఘాల ఐక్యవేదిక అధ్యక్షులు, మాజీ డీవీఎంసీ సభ్యులు, మాల మహానాడు జిల్లా అధ్యక్షులు, ఎంఆర్పీఎస్ నాయకులు తిమ్మాపురం గంగన్న, కొగిర రామాంజి తదితరులు దాసరి ఓబులేసును పట్టు శాలువాతో సత్కరించి, పూలమాలలు వేసి ఘనంగా అభినందించారు.
పట్టు రైతుల సంక్షేమం కోసం ఇదే స్ఫూర్తితో భవిష్యత్తులో మరిన్ని సేవలు అందించాలని, పెనుకొండ డివిజన్లో పట్టు పరిశ్రమ మరింత అభివృద్ధి చెందేలా కృషి చేయాలని వారు ఆకాంక్షించారు. పట్టు రైతులకు మరింత మెరుగైన సాంకేతిక సహకారం అందిస్తూ, పట్టు శాఖకు, రైతులకు మరింత పేరు ప్రతిష్ఠలు తీసుకురావాలని కోరారు.
దాసరి ఓబులేసుకు లభించిన ఈ పురస్కారం పట్టు పరిశ్రమ శాఖలో ఆయన అందిస్తున్న సేవలకు గుర్తింపుగా నిలుస్తుందని నాయకులు పేర్కొంటూ, భవిష్యత్తులో మరిన్ని ఉత్తమ పురస్కారాలు అందుకోవాలని ఆకాంక్షించారు.
0 కామెంట్లు