కుటుంబ సభ్యుల అడ్డంకుల మధ్య పవన్కుమార్, శివకుమార్ అరెస్ట్
విషద్రావణం సేవించిన వ్యక్తి.. ఆసుపత్రికి తరలింపు
మీకోసం న్యూస్ కదిరి ఆగస్టు 12 : ఎస్సీ, ఎస్టీ కోర్టు జారీ చేసిన వారెంట్ల అమలులో భాగంగా అరెస్టు చేయడానికి వెళ్లిన పోలీసులను కుటుంబ సభ్యులు అడ్డుకున్న ఘటన కదిరి పట్టణంలో కలకలం రేపింది. పోలీసుల విధులకు ఆటంకం కలిగించడంతో పాటు బెదిరింపులకు పాల్పడినట్లు పట్టణ సీఐ వెంకటేశ్వర్లు తెలిపారు. కుటుంబ సభ్యుల నుంచి అడ్డంకులు ఎదురైనప్పటికీ పోలీసులు కోర్టు వారెంట్లను అమలు చేసి పవన్కుమార్, శివకుమార్ అనే అన్నదమ్ములను అరెస్టు చేసినట్లు వెల్లడించారు.
కోర్టు ఆదేశాల మేరకు వారెంట్లను అమలు చేసేందుకు పోలీసులు సంబంధిత వ్యక్తుల వద్దకు వెళ్లిన సమయంలో కుటుంబ సభ్యులు పోలీసులను అడ్డుకున్నట్లు సీఐ తెలిపారు. విధుల్లో ఉన్న పోలీసులతో వాగ్వాదానికి దిగడంతో పాటు బెదిరింపులకు పాల్పడినట్లు పేర్కొన్నారు. అయినప్పటికీ పోలీసులు పరిస్థితిని అదుపులోకి తీసుకుని వారెంట్ల అమలు ప్రక్రియను కొనసాగించినట్లు చెప్పారు.
విషద్రావణం సేవించిన వ్యక్తి
అరెస్టు ప్రక్రియ కొనసాగుతున్న సమయంలో ఒక వ్యక్తి విషద్రావణం సేవించినట్లు పోలీసులు తెలిపారు. వెంటనే అప్రమత్తమైన పోలీసులు అతడిని కదిరి ప్రభుత్వ ఏరియా ఆసుపత్రికి తరలించారు. అక్కడ వైద్యులు చికిత్స అందించారు. అనంతరం మెరుగైన వైద్యం కోసం అనంతపురం ఆసుపత్రికి రిఫర్ చేసినట్లు సీఐ వెల్లడించారు.
ప్రస్తుతం ఆసుపత్రిలో వైద్య చికిత్స కొనసాగుతున్నట్లు తెలిపారు. సంబంధిత వ్యక్తి ఆరోగ్య పరిస్థితిపై వైద్యులు పర్యవేక్షణ కొనసాగిస్తున్నారని పేర్కొన్నారు.
కోర్టు ఆదేశాలను ధిక్కరించొద్దు
కోర్టు జారీ చేసిన వారెంట్లను అమలు చేయకుండా అడ్డుకోవడం, పోలీసుల విధులకు ఆటంకం కలిగించడం, బెదిరింపులకు పాల్పడటం చట్టపరంగా చర్యలకు దారితీస్తుందని పట్టణ సీఐ వెంకటేశ్వర్లు హెచ్చరించారు. కోర్టు ఆదేశాలను ప్రతి ఒక్కరూ గౌరవించాలని సూచించారు.
చట్టపరమైన ప్రక్రియలో పోలీసులకు సహకరించాలని, విధులకు ఆటంకం కలిగించే చర్యలకు పాల్పడితే చట్టప్రకారం కేసులు నమోదు చేసి చర్యలు తీసుకుంటామని స్పష్టం చేశారు.
వైద్య చికిత్సలు పూర్తయిన అనంతరం సంబంధిత ముద్దాయిలను జిల్లా కోర్టులో హాజరుపరిచి, కోర్టు ఆదేశాల మేరకు రిమాండ్కు తరలిస్తామని సీఐ వెంకటేశ్వర్లు తెలిపారు.
ఈ ఘటనకు సంబంధించిన వివరాలను పట్టణ సీఐ వెంకటేశ్వర్లు మీడియాకు వెల్లడించారు.
0 కామెంట్లు