ఫ్రీహోల్డ్‌’ నిషేధం ఎత్తివేత ఎవరి ప్రయోజనాల కోసం?

అసైన్డ్‌ భూములపై ప్రభుత్వం స్పష్టత ఇవ్వాలి: వ్యవసాయ కార్మిక సంఘం

మీకోసం న్యూస్ ,అమరావతి, సెప్టెంబర్‌ 23:

అసైన్డ్‌ భూములకు ‘ఫ్రీహోల్డ్‌’ హక్కులు కల్పిస్తూ రాష్ట్ర ప్రభుత్వం జారీ చేసిన జీవో ఎం.ఎస్‌. నం.588పై వ్యవసాయ కార్మిక సంఘం ఏపీ రాష్ట్ర కార్యదర్శి వి. వెంకటేశ్వర్లు ప్రశ్నలు లేవనెత్తారు. ఫ్రీహోల్డ్‌ నిషేధం ఎత్తివేయడం వల్ల పేదలకంటే ఇప్పటికే అసైన్డ్‌ భూములను అనర్హంగా ఆక్రమించిన పెత్తందారులు, రాజకీయ నాయకులకే ఎక్కువ ప్రయోజనం కలుగుతుందని ఆయన ఆరోపించారు.

ప్రభుత్వం గుర్తించిన 14,36,660 ఎకరాల నిషేధిత భూముల్లో 9,08,472 ఎకరాలకు ఫ్రీహోల్డ్‌ కల్పిస్తూ జీవో జారీ చేసిందని వెంకటేశ్వర్లు తెలిపారు. మరో 5,28,188 ఎకరాలను వివిధ కారణాలతో నిషేధిత జాబితాలోనే ఉంచినట్లు పేర్కొన్నారు. ఫ్రీహోల్డ్‌ నుంచి మినహాయించిన భూముల్లో అసైన్డ్‌ భూములే అధికంగా ఉన్నాయని, నిషేధిత జాబితాలో పొరపాటున చేరిన జిరాయితీ భూములు 5,422 ఎకరాలు మాత్రమేనని ప్రభుత్వం జీవోలో పేర్కొన్నట్లు ఆయన తెలిపారు.

31.50 లక్షల ఎకరాల అసైన్డ్‌ భూముల పరిస్థితి ఏంటి?

విభజిత ఆంధ్రప్రదేశ్‌లో సుమారు 26 లక్షల మంది పేదలకు 31.50 లక్షల ఎకరాలకు పైగా భూములు అసైన్‌ చేసినట్లు ప్రభుత్వ లెక్కలు చెబుతున్నాయని వెంకటేశ్వర్లు పేర్కొన్నారు. అయితే ప్రస్తుతం కేవలం 14,36,660 ఎకరాలను మాత్రమే గుర్తించడం, మిగిలిన సుమారు 17 లక్షల ఎకరాల పరిస్థితిపై ప్రభుత్వం వివరాలు వెల్లడించకపోవడం అనేక ప్రశ్నలకు తావిస్తోందన్నారు.

ఆ భూములు అభివృద్ధి పేరుతో పెట్టుబడిదారులు, కార్పొరేట్లకు వెళ్లాయా, భూ బ్యాంకుల్లో ఉంచారా లేదా రాజకీయ పలుకుబడి ఉన్నవారి ఆధీనంలో ఉన్నాయా అనే అంశాలపై ప్రభుత్వం స్పష్టత ఇవ్వాలని డిమాండ్‌ చేశారు.

1977 చట్టం నుంచి ఫ్రీహోల్డ్‌ వరకు

ప్రభుత్వం పేదలకు కేటాయించిన అసైన్డ్‌ భూముల అమ్మకాలు, కొనుగోళ్లను నిరోధించేందుకు 1977లో భూ బదలాయింపు నిషేధ చట్టాన్ని తీసుకొచ్చిందని ఆయన తెలిపారు. ఈ చట్టం పేదల భూములకు రక్షణ కవచంగా పనిచేసిందన్నారు.

2023లో అప్పటి వైసీపీ ప్రభుత్వం అసైన్డ్‌ భూములకు సంబంధించిన చట్టాన్ని సవరించి, ఇళ్ల స్థలాలను 10 సంవత్సరాల తర్వాత, సాగు భూములను 20 సంవత్సరాల తర్వాత విక్రయించుకునే అవకాశం కల్పించే చర్యలు చేపట్టిందని వెంకటేశ్వర్లు పేర్కొన్నారు. అయితే ఆ ప్రక్రియ పూర్తిగా అమలులోకి రాకముందే ప్రభుత్వం మారిందన్నారు.

అక్రమంగా భూములు పొందిన వారి వివరాలు వెల్లడించాలి

గతంలో ఫ్రీహోల్డ్‌ కల్పించిన భూముల్లో పెద్ద మొత్తంలో భూములు అనర్హుల చేతుల్లోకి వెళ్లినట్లు ఆరోపణలు వచ్చినప్పటికీ, వారి పేర్లను ప్రభుత్వం ఇప్పటివరకు బహిర్గతం చేయలేదని వెంకటేశ్వర్లు విమర్శించారు.

అనర్హుల నుంచి భూములను స్వాధీనం చేసుకుని అర్హులైన పేదలకు తిరిగి కేటాయించాల్సిన అవసరం ఉందన్నారు. కేవలం భూములపై నిషేధం ఎత్తివేయడం ద్వారా పేదలకు న్యాయం జరగదని పేర్కొన్నారు.

‘చుక్కల భూముల’పై కూడా ప్రశ్నలు

చుక్కల భూముల సమస్యను కూడా ప్రభుత్వం పూర్తిగా పరిష్కరించలేదని వెంకటేశ్వర్లు అన్నారు. రీసెటిల్‌మెంటరీ రిజిస్టర్‌ (ఆర్‌ఎస్‌ఆర్‌)లో యాజమాన్యం స్పష్టంగా నిర్ధారణ కాని భూములకు మూడు చుక్కల గుర్తులు పెట్టడం ద్వారా అవి ‘డాట్‌ ల్యాండ్స్‌’గా మారాయని వివరించారు.

చుక్కలు ఉన్నంత మాత్రాన భూమి ప్రభుత్వ భూమిగా పరిగణించలేమని 2014లో హైకోర్టు స్పష్టం చేసిందని ఆయన పేర్కొన్నారు. సమస్య పరిష్కారానికి ఉన్నత స్థాయి కమిటీ ఏర్పాటు చేయాలని కోర్టు సూచించినప్పటికీ, అది పూర్తిస్థాయిలో అమలు కాలేదని ఆరోపించారు.

2017లో డాట్‌ ల్యాండ్‌ యాక్ట్‌ తీసుకొచ్చినప్పటికీ సమస్య ఇంకా పూర్తిగా పరిష్కారం కాలేదన్నారు. తాజాగా 7,85,500 ఎకరాల భూములకు చుక్కలు తొలగించి ఫ్రీహోల్డ్‌ కల్పిస్తూ ప్రభుత్వం నిర్ణయం తీసుకుందని తెలిపారు.

పేదలకు రక్షణ కల్పించాలని డిమాండ్‌

ఫ్రీహోల్డ్‌ విధానం వల్ల పేదల చేతుల్లో ఉన్న భూములు తిరిగి పెద్దల చేతుల్లోకి వెళ్లే అవకాశం ఉందని వ్యవసాయ కార్మిక సంఘం ఆందోళన వ్యక్తం చేసింది. ప్రభుత్వం నిర్ణయం తీసుకునే ముందు రాజకీయ పార్టీలు, రైతు సంఘాలు, వ్యవసాయ కార్మిక సంఘాలు, అసైన్డ్‌ కమిటీల అభిప్రాయాలను తీసుకోవాలని వెంకటేశ్వర్లు కోరారు.

ఐదెకరాల్లోపు భూమి కలిగిన పేద రైతులకు రక్షణతో కూడిన ఫ్రీహోల్డ్‌ హక్కులు కల్పించాలని, అసైన్డ్‌ భూములు కోల్పోయిన ప్రతి పేద కుటుంబానికి భూమిని తిరిగి అందించాలని ఆయన డిమాండ్‌ చేశారు. అదే విధంగా అన్ని హక్కులు ఉన్నప్పటికీ నిషేధిత జాబితాల్లో చేరిన జిరాయితీ భూముల సమస్యలను కూడా పరిష్కరించాలని కోరారు.

– వి. వెంకటేశ్వర్లు,

వ్యవసాయ కార్మిక సంఘం ఏపీ రాష్ట్ర కార్యదర్శి 

✍️ Editor: Prakash | Meekosam.in
Somandepalli | Sri Sathya Sai District | Contact: meekosamnews2026@gmail.com