అభివృద్ధే లక్ష్యం.. ప్రజల వద్దకే పాలన: మంత్రి సవిత

  పెనుకొండలో ఇంటింటి ప్రచారం – అభివృద్ధి పనులు, సంక్షేమ పథకాలపై ప్రజలకు వివరాలు

మీకోసం న్యూస్,పెనుకొండ, శ్రీ సత్యసాయి జిల్లా: ప్రజల సమస్యలను నేరుగా తెలుసుకుని పరిష్కరించడం, ప్రతి కుటుంబానికి సంక్షేమం అందించడం, ప్రతి గ్రామాన్ని అభివృద్ధి చేయడమే కూటమి ప్రభుత్వ ప్రధాన లక్ష్యమని రాష్ట్ర బీసీ సంక్షేమ, చేనేత & జౌళి శాఖ మంత్రి సవిత పేర్కొన్నారు. ప్రజలతోనే ప్రభుత్వం, ప్రజల కోసమే పాలన సాగుతోందని ఆమె స్పష్టం చేశారు.

పెనుకొండ మున్సిపాలిటీ పరిధిలోని 20వ వార్డు షీఫారం మరియు మహాదేవపల్లి ప్రాంతాల్లో మంత్రి సవిత విస్తృతంగా పర్యటించారు. ఇంటింటికీ వెళ్లి ప్రభుత్వ అభివృద్ధి, సంక్షేమ కార్యక్రమాలను ప్రజలకు వివరించారు. వివిధ పథకాల లబ్ధిదారులతో మాట్లాడి వాటి అమలు తీరును తెలుసుకోగా, స్థానిక సమస్యలను స్వయంగా పరిశీలించి పరిష్కారానికి చర్యలు తీసుకుంటామని హామీ ఇచ్చారు.

 ప్రజాస్వామ్యబద్ధంగా పాలన – హింసకు చోటు లేదు

ఈ సందర్భంగా మంత్రి మాట్లాడుతూ గత రెండున్నరేళ్లుగా ప్రజల వద్దకే పాలనను తీసుకెళ్లి వారి సమస్యలను ప్రత్యక్షంగా తెలుసుకుంటూ పరిష్కరిస్తున్నామని తెలిపారు. ప్రజాస్వామ్య విలువలకు కట్టుబడి ప్రభుత్వం పనిచేస్తోందని, ఎన్నికల్లో కూడా ప్రజల ముందుకే వెళ్లి ఓట్లు అడుగుతామని చెప్పారు.

గత ప్రభుత్వ హయాంలో జరిగిన అవినీతి, అక్రమాలపై చట్టపరమైన ప్రక్రియ కొనసాగుతోందని పేర్కొంటూ, చట్టాన్ని ఎవరూ తమ చేతుల్లోకి తీసుకోవద్దని సూచించారు. కూటమి ప్రభుత్వం ఎక్కడా హింసను ప్రేరేపించే విధంగా వ్యవహరించలేదని, శాంతి భద్రతలకు భంగం కలిగించే వ్యాఖ్యలు తమ నాయకత్వం చేయదని స్పష్టం చేశారు.

 రూ.20 కోట్లతో మున్సిపాలిటీ అభివృద్ధి

పెనుకొండ మున్సిపాలిటీ పరిధిలో సుమారు రూ.20 కోట్ల వ్యయంతో పలు అభివృద్ధి పనులు చేపడుతున్నామని మంత్రి వెల్లడించారు. రోడ్లు, డ్రైనేజీలు, తాగునీటి సౌకర్యాలు, మౌలిక వసతుల అభివృద్ధికి ప్రాధాన్యం ఇస్తున్నామని తెలిపారు.

మహాదేవపల్లిలో రూ.45 లక్షలతో వివిధ అభివృద్ధి పనులకు త్వరలో భూమిపూజ నిర్వహించనున్నట్లు ప్రకటించారు. గ్రామ ప్రజలకు అవసరమైన మౌలిక సదుపాయాలను కల్పించడం ప్రభుత్వ బాధ్యతగా భావిస్తున్నామని చెప్పారు.

 మహాదేవపల్లి బ్రిడ్జి సమస్యకు పరిష్కారం

ఎన్నో ఏళ్లుగా ప్రజలు ఎదురుచూస్తున్న మహాదేవపల్లి బ్రిడ్జి నిర్మాణాన్ని త్వరలో పూర్తి చేసేందుకు అవసరమైన చర్యలు తీసుకుంటామని మంత్రి హామీ ఇచ్చారు. బ్రిడ్జి పూర్తయితే గ్రామ ప్రజల రవాణా సౌకర్యాలు మెరుగుపడటంతో పాటు వ్యవసాయ, విద్య, వైద్య అవసరాలకు కూడా ఎంతో ఉపయోగపడుతుందని పేర్కొన్నారు.

 అమృత్–2 ద్వారా ఇంటింటికీ మినరల్ వాటర్

మున్సిపాలిటీలో అమృత్–2 పథకం కింద సుమారు రూ.100 కోట్లతో ప్రతి ఇంటికీ నాణ్యమైన మినరల్ తాగునీరు అందించే భారీ ప్రాజెక్టును ప్రభుత్వం అమలు చేస్తోందని మంత్రి తెలిపారు. ప్రజల ఆరోగ్యాన్ని దృష్టిలో పెట్టుకొని తాగునీటి రంగంలో ప్రత్యేక చర్యలు తీసుకుంటున్నామని చెప్పారు.

 25 ఎకరాల్లో ఇళ్ల పట్టాల పంపిణీ

షీఫారం ప్రాంతంలో సుమారు 25 ఎకరాల్లో అర్హులైన పేదలకు ఇళ్ల స్థలాల పంపిణీ కార్యక్రమాన్ని చేపడుతున్నామని మంత్రి వెల్లడించారు. త్వరలోనే వేలాది కుటుంబాలకు ఇళ్ల పట్టాలు అందజేస్తామని చెప్పారు. పేదలకు సొంత ఇంటి కలను నెరవేర్చడమే ప్రభుత్వ సంకల్పమని ఆమె పేర్కొన్నారు.

ఈ సందర్భంగా పలువురు లబ్ధిదారులకు ఇంటి పొజిషన్ పత్రాలను మంత్రి స్వయంగా అందజేశారు.

 పరిశ్రమలతో ఉపాధి – సంక్షేమంతో భరోసా

కియా పరిశ్రమతో పాటు ఇతర పారిశ్రామిక సంస్థల ద్వారా ప్రత్యక్షంగా, పరోక్షంగా లక్షలాది మందికి ఉపాధి అవకాశాలు లభిస్తున్నాయని మంత్రి తెలిపారు. పరిశ్రమల అభివృద్ధి వల్ల స్థానిక యువతకు ఉద్యోగాలు పెరిగి ప్రజల ఆర్థిక పరిస్థితి మెరుగుపడుతుందని చెప్పారు.

విద్యార్థుల తల్లిదండ్రులకు అండగా ‘తల్లికి వందనం’ పథకం, మహిళలకు ఉచిత బస్సు ప్రయాణం, ఇతర సంక్షేమ కార్యక్రమాలను ప్రభుత్వం సమర్థవంతంగా అమలు చేస్తోందన్నారు. ప్రచార ఆర్భాటానికి కాకుండా ప్రజలకు ఉపయోగపడే సేవలు అందించడానికే తమ ప్రభుత్వం ప్రాధాన్యం ఇస్తోందని స్పష్టం చేశారు.

ప్రజల నమ్మకమే ప్రభుత్వ బలం

ప్రతి కుటుంబానికి సంక్షేమం, ప్రతి గ్రామానికి అభివృద్ధి అనే లక్ష్యంతో ప్రభుత్వం నిరంతరం కృషి చేస్తోందని మంత్రి సవిత అన్నారు. ప్రజల సమస్యలను ప్రత్యక్షంగా తెలుసుకుని వాటి పరిష్కారానికి వేగంగా చర్యలు తీసుకోవడమే తమ పాలన ప్రత్యేకత అని తెలిపారు. ప్రజల నమ్మకాన్ని నిలబెట్టుకుంటూ అభివృద్ధి కార్యక్రమాలను మరింత వేగవంతం చేస్తామని ఆమె హామీ ఇచ్చారు.

ఈ కార్యక్రమంలో పలువురు అధికారులు, కూటమి నాయకులు, కార్యకర్తలు మరియు స్థానిక ప్రజలు పెద్ద సంఖ్యలో పాల్గొన్నారు.

✍️ Editor: Prakash | Meekosam.in
Somandepalli | Sri Sathya Sai District | Contact: meekosamnews2026@gmail.com