ధర్మవరంలో పోలీసుల ఫ్లాగ్ మార్చ్

మున్సిపల్ ఎన్నికల నేపథ్యంలో 300 మంది పోలీసులతో పటిష్ట బందోబస్తు

మీకోసం న్యూస్ ,ధర్మవరం, అక్టోబర్ 30:
నవంబర్ 1న జరగనున్న మున్సిపల్ ఎన్నికలను ప్రశాంతంగా, స్వేచ్ఛాయుతంగా, నిష్పక్షపాతంగా నిర్వహించడంతో పాటు ప్రజల్లో భద్రతా భావాన్ని కల్పించడమే లక్ష్యంగా శ్రీ సత్యసాయి జిల్లా పోలీసు యంత్రాంగం పటిష్ట భద్రతా చర్యలు చేపట్టింది. జిల్లా ఎస్పీ ఎస్. సతీష్ కుమార్, ఐపీఎస్ ఆధ్వర్యంలో శుక్రవారం ధర్మవరం పట్టణంలో పోలీసులు ఫ్లాగ్ మార్చ్ నిర్వహించారు.

పట్టణంలోని కాలేజ్ సర్కిల్ నుంచి గాంధీ సర్కిల్ వరకు జరిగిన ఈ ఫ్లాగ్ మార్చ్‌లో ధర్మవరం సబ్ డివిజన్ పోలీసు అధికారులు, సిబ్బంది, స్పెషల్ పార్టీ పోలీసులు పాల్గొన్నారు. ఎన్నికల సమయంలో శాంతిభద్రతలను కాపాడేందుకు పోలీసు యంత్రాంగం సిద్ధంగా ఉందనే భరోసా కల్పించడమే ఫ్లాగ్ మార్చ్ ప్రధాన ఉద్దేశంగా అధికారులు తెలిపారు.

300 మంది పోలీసులతో బందోబస్తు

ధర్మవరం మున్సిపాలిటీ పరిధిలో మొత్తం 48 వార్డులు, 45 పోలింగ్ లొకేషన్లు, 134 పోలింగ్ స్టేషన్లలో ఎన్నికలు జరగనున్నట్లు జిల్లా ఎస్పీ తెలిపారు. వీటిలో 10 నుంచి 11 పోలింగ్ లొకేషన్లను సెన్సిటివ్, హైపర్ సెన్సిటివ్ ప్రాంతాలుగా గుర్తించి ప్రత్యేక నిఘా ఏర్పాటు చేసినట్లు వెల్లడించారు.

ఎన్నికల బందోబస్తు కోసం ధర్మవరం పట్టణంలో సుమారు 300 మంది పోలీసు సిబ్బందిని నియమించినట్లు ఎస్పీ వివరించారు. పోలింగ్ కేంద్రాలు, సమస్యాత్మక ప్రాంతాల వద్ద పరిస్థితులను నిరంతరం పర్యవేక్షిస్తూ అవసరమైన భద్రతా చర్యలు చేపట్టనున్నట్లు తెలిపారు.

రౌడీషీటర్లు, ట్రబుల్ మాంగర్స్‌పై ప్రత్యేక నిఘా

ఎన్నికల సమయంలో శాంతిభద్రతలకు విఘాతం కలిగించే అవకాశం ఉన్న వ్యక్తులపై ప్రత్యేక నిఘా కొనసాగిస్తున్నట్లు ఎస్పీ తెలిపారు. రౌడీషీటర్లు, ట్రబుల్ మాంగర్స్ కదలికలను పోలీసులు నిశితంగా పరిశీలిస్తున్నారని పేర్కొన్నారు.

ఇప్పటికే పలువురిపై బైండోవర్ చర్యలు చేపట్టడంతో పాటు గత ఎన్నికలకు సంబంధించిన కేసుల్లో ఉన్న వారికి నోటీసులు జారీ చేసినట్లు తెలిపారు. ఎన్నికల సమయంలో అల్లర్లు, గొడవలకు పాల్పడే వారిపై చట్టప్రకారం కఠిన చర్యలు తీసుకుంటామని స్పష్టం చేశారు.

నిబంధనలు ఉల్లంఘిస్తే చర్యలు

ఎన్నికల సమయంలో ఎవరైనా అల్లర్లు సృష్టించినా, గొడవలకు పాల్పడినా, ఓటర్లను బెదిరించినా లేదా శాంతిభద్రతలకు విఘాతం కలిగించినా ఉపేక్షించేది లేదని జిల్లా ఎస్పీ హెచ్చరించారు.

144 సెక్షన్ అమలులో ఉన్నందున నిబంధనలకు విరుద్ధంగా గుంపులుగా చేరకూడదని సూచించారు. ఎన్నికల సమయంలో అమల్లో ఉన్న ఆంక్షలను ప్రతి ఒక్కరూ పాటించాలని, నిబంధనలు ఉల్లంఘించిన వారిపై చట్టప్రకారం చర్యలు తీసుకుంటామని తెలిపారు.

ఓటర్లకు ఎస్పీ సూచనలు

పోలింగ్ కేంద్రాలకు వచ్చే ఓటర్లు క్యూలైన్లలో క్రమశిక్షణతో వేచి ఉండి తమ ఓటు హక్కును వినియోగించుకోవాలని జిల్లా ఎస్పీ సూచించారు. ఓటు వేసిన వెంటనే పోలింగ్ కేంద్రం పరిసర ప్రాంతాల నుంచి వెళ్లిపోవాలని కోరారు.

ఓటర్లను ఎవరైనా మభ్యపెట్టడం, ప్రలోభాలకు గురిచేయడం లేదా ఓటు వేయకుండా అడ్డుకోవడం వంటి చర్యలకు పాల్పడితే చట్టపరమైన చర్యలు తీసుకుంటామని హెచ్చరించారు.

ప్రతి ఓటరు ఎలాంటి ఒత్తిడి, భయం లేకుండా తన ఓటు హక్కును వినియోగించుకునేలా పోలీసులు అవసరమైన భద్రతా ఏర్పాట్లు చేస్తున్నట్లు తెలిపారు.

ప్రజలు పోలీసులకు సహకరించాలి

మున్సిపల్ ఎన్నికలు ప్రశాంత వాతావరణంలో జరిగేందుకు ప్రజలందరూ పోలీసులకు సహకరించాలని జిల్లా ఎస్పీ ఎస్. సతీష్ కుమార్ విజ్ఞప్తి చేశారు. ఎన్నికల సమయంలో శాంతిభద్రతలకు విఘాతం కలిగించే చర్యలకు దూరంగా ఉండాలని, ఎన్నికల నిబంధనలను పాటించాలని సూచించారు.

ఫ్లాగ్ మార్చ్ ద్వారా ధర్మవరం పట్టణంలో ఎన్నికల భద్రతపై పోలీసులు ప్రత్యేక దృష్టి సారించినట్లు స్పష్టం చేశారు. సున్నిత, అత్యంత సున్నిత ప్రాంతాల్లో అదనపు నిఘాతో పాటు అవసరమైన భద్రతా చర్యలు కొనసాగుతాయని అధికారులు తెలిపారు.

ఈ కార్యక్రమంలో డీఎస్పీలు జగన్నాథ్ రాజు, శ్రీనివాసులు, సీఐలు రెడ్డప్ప, జయ నాయక్, ప్రభాకర్, మహమ్మద్ అలీ, లింగన్న, బొజ్జప్ప, సునీత, ఎస్సైలు, ధర్మవరం పోలీసు సిబ్బంది, స్పెషల్ పార్టీ, ఏపీఎస్పీ పోలీసు సిబ్బంది పాల్గొన్నారు.