బాలల సంరక్షణకు ప్రత్యేక చట్టాలు.. బాల్య వివాహాలతో అనర్థాలు!

విద్యార్థి దశ నుంచే చట్టాలపై అవగాహన పెంచుకోవాలి

అదనపు జూనియర్ సివిల్ జడ్జి లలితా లక్ష్మి హారిక కోట

మీకోసం న్యూస్ ,హిందూపురం, నవంబర్ 13 :

బాలల సంరక్షణ కోసం ప్రభుత్వం అనేక ప్రత్యేక చట్టాలను అమలు చేస్తోందని హిందూపురం అదనపు జూనియర్ సివిల్ జడ్జి లలితా లక్ష్మి హారిక కోట పేర్కొన్నారు. విద్యార్థి దశ నుంచే చట్టాలపై అవగాహన పెంచుకొని, వాటిని సద్వినియోగం చేసుకోవాలని సూచించారు.

బాలల దినోత్సవం పురస్కరించుకొని రాష్ట్ర ఉన్నత న్యాయస్థానం ఆదేశాల మేరకు శుక్రవారం హిందూపురంలోని అంబేద్కర్ గురుకుల బాలికల పాఠశాలలో 'సురక్షిత్ బచపన్ అభియాన్' కార్యక్రమంలో భాగంగా న్యాయ విజ్ఞాన సదస్సు నిర్వహించారు.

బాలల రక్షణకు ప్రత్యేక చట్టాలు

ఈ సందర్భంగా న్యాయమూర్తి మాట్లాడుతూ బాలల హక్కులు, రక్షణ కోసం అనేక ప్రత్యేక చట్టాలు అమలులో ఉన్నాయని వివరించారు. ముఖ్యంగా పోక్సో (POCSO) చట్టం ద్వారా బాలలపై లైంగిక వేధింపులకు పాల్పడితే చట్టపరమైన చర్యలు తీసుకుంటారని తెలిపారు.

బాలలపై జరిగే వేధింపులను నిర్లక్ష్యం చేయకుండా సంబంధిత అధికారుల దృష్టికి తీసుకెళ్లాలని సూచించారు.

బాల్య వివాహాలతో అనేక అనర్థాలు

సమాజంలో ప్రధాన సమస్యగా ఉన్న బాల్య వివాహాల నిర్మూలనకు ప్రతి ఒక్కరూ తమవంతు సహకారం అందించాలని న్యాయమూర్తి పిలుపునిచ్చారు.

18 ఏళ్లలోపు బాలికలకు ఎక్కడైనా వివాహాలు నిర్వహిస్తున్నట్లు తెలిస్తే వెంటనే సంబంధిత అధికారులకు సమాచారం అందించాలని సూచించారు. బాల్య వివాహాల వల్ల బాలికల ఆరోగ్యం, విద్య, భవిష్యత్తుపై తీవ్ర ప్రభావం పడుతుందని పేర్కొన్నారు.

14 ఏళ్లలోపు పిల్లలతో పనులు చేయించరాదు

భారత రాజ్యాంగం, విద్యా హక్కు చట్టం ప్రకారం 6 నుంచి 14 ఏళ్లలోపు బాలబాలికలకు నిర్బంధ ఉచిత విద్య అందించాల్సిన బాధ్యత ఉందని తెలిపారు.

అదేవిధంగా 14 ఏళ్లలోపు పిల్లలను చట్టవిరుద్ధంగా పనుల్లో పెట్టుకోవడం నేరమని, పిల్లలతో పనులు చేయిస్తే చట్టపరమైన చర్యలు తప్పవని హెచ్చరించారు.

గుడ్ టచ్.. బ్యాడ్ టచ్‌పై అవగాహన అవసరం

విద్యార్థులు గుడ్ టచ్, బ్యాడ్ టచ్ గురించి అవగాహన కలిగి ఉండాలని, తమకు అసౌకర్యం కలిగించే స్పర్శల పట్ల అప్రమత్తంగా ఉండాలని న్యాయమూర్తి సూచించారు.

అనుమతి లేకుండా బాలికలను ఎవరూ తాకరాదని, ఏదైనా వేధింపులు ఎదురైతే భయపడకుండా తల్లిదండ్రులు, ఉపాధ్యాయులు లేదా సంబంధిత అధికారులకు తెలియజేయాలని వివరించారు.

చట్టాలపై ప్రజల్లో చైతన్యం తీసుకురావాలి

విద్యార్థులు కేవలం తమకే కాకుండా పరిసర ప్రాంతాల్లోని ప్రజలకు కూడా బాలల హక్కులు, బాలల సంరక్షణ చట్టాల గురించి వివరించి అవగాహన కల్పించాలని సూచించారు.

'నేటి బాలలే రేపటి పౌరులు' అనే నానుడికి అనుగుణంగా విద్యార్థులు క్రమశిక్షణతో విద్యాభ్యాసం సాగించి, ఉన్నత స్థాయికి చేరుకుని తల్లిదండ్రులు గర్వపడేలా ఎదగాలని ఆకాంక్షించారు.

అనంతరం పాఠశాల ఆవరణలో న్యాయమూర్తి మొక్కలు నాటారు.

కార్యక్రమంలో పాల్గొన్న వారు

ఈ కార్యక్రమంలో పాఠశాల ప్రిన్సిపాల్ నాగమణి, ఉప ప్రిన్సిపాల్ ఇందిరా, లోక్ అదాలత్ పారా లీగల్ వాలంటీర్లు మార్గదర్శి మాళప్ప, పరిగి సురేష్, కోర్టు సిబ్బంది రాజా తదితరులు పాల్గొన్నారు.

మీకోసం NEWS మీ మాట | మా వార్త | మీ కోసం