రొద్దం: అక్రమంగా తుమ్మ చెట్ల నరికివేత.. కలప తరలిస్తున్న వాహనం సీజ్!

తురకలాపట్టం చెరువు వద్ద అటవీశాఖ అధికారుల తనిఖీలు.. నిందితుడు దాల్ రెడ్డిపై చర్యలకు సిద్ధం

మీకోసం NEWS | శ్రీ సత్యసాయి జిల్లా

శ్రీ సత్యసాయి జిల్లా పెనుకొండ నియోజకవర్గంలోని రొద్దం మండలం తురకలాపట్టం చెరువు వద్ద అక్రమంగా తుమ్మ చెట్లను నరికి, కలపను తరలిస్తున్న వాహనాన్ని అటవీశాఖ అధికారులు సీజ్ చేశారు. అటవీ సంపదను అక్రమంగా తరలిస్తున్నారనే సమాచారంతో అధికారులు సంఘటనా స్థలానికి చేరుకుని వాహనాన్ని స్వాధీనం చేసుకున్నారు.

శ్రీ సత్యసాయి జిల్లా అటవీశాఖ అధికారి T. చక్రపాణి సూచనలు, పెనుకొండ అటవీక్షేత్రాధికారి J. మదన్ మోహన్ ఆదేశాల మేరకు అటవీ సెక్షన్ అధికారి K. రాహుల్, అటవీ బీట్ అధికారి D. శ్రీకాంత్ తనిఖీలు చేపట్టారు. ఈ క్రమంలో అక్రమంగా కలపను తరలిస్తున్న వాహనాన్ని గుర్తించి సీజ్ చేశారు. అనంతరం తదుపరి చట్టపరమైన చర్యల నిమిత్తం వాహనాన్ని అటవీ కార్యాలయానికి తరలించారు.

ఈ వ్యవహారంలో దాల్ రెడ్డి అనే వ్యక్తిని నిందితుడిగా గుర్తించినట్లు అటవీశాఖ అధికారులు వెల్లడించారు. ఘటనపై సంబంధిత నిబంధనల ప్రకారం తదుపరి చర్యలు చేపడుతున్నారు.

అటవీ సంపదకు నష్టం కలిగిస్తే కఠిన చర్యలు

ఈ సందర్భంగా అటవీశాఖ అధికారులు మాట్లాడుతూ.. అనుమతులు లేకుండా చెట్లను నరికివేయడం, అటవీ సంపదను అక్రమంగా తరలించడం చట్టరీత్యా నేరమని స్పష్టం చేశారు. ఇలాంటి అక్రమ కార్యకలాపాలకు పాల్పడే వారిపై కఠినమైన చట్టపరమైన చర్యలు తీసుకుంటామని హెచ్చరించారు. అటవీ సంపదను కాపాడటంలో ప్రజలు కూడా సహకరించాలని కోరారు.

అటవీ సంపద పరిరక్షణకు అధికారులు నిరంతరం నిఘా కొనసాగిస్తున్నారు. అక్రమ కలప రవాణాపై ఉక్కుపాదం మోపుతామని స్పష్టం చేస్తున్నారు.

మీకోసం NEWS
నిజం మా ధర్మం | ప్రజలే మా శక్తి