బాగేపల్లి (కర్ణాటక)(మీకోసం న్యూస్ ): కర్ణాటకలో రెండు దశాబ్దాలకుపైగా అక్రమంగా నివసిస్తున్న పాకిస్థాన్కు చెందిన తల్లి, కుమారుడిని పోలీసులు అదుపులోకి తీసుకున్నారు. నకిలీ పత్రాల ఆధారంగా భారత ప్రభుత్వ గుర్తింపు కార్డులు పొందినట్లు ఆరోపణలు రావడంతో ఈ వ్యవహారం వెలుగులోకి వచ్చింది.
చిక్కబళ్లాపూర్ జిల్లా బాగేపల్లి తాలూకా దాసగరిపల్లి గ్రామంలో నివసిస్తున్న ఫర్హానాజ్ (52), ఆమె కుమారుడు మహమ్మద్ ఫర్దీన్ (21) ఇటీవల రేషన్ కార్డు, ఓటరు జాబితాలో పేరు నమోదు కోసం దరఖాస్తు చేశారు. వారు సమర్పించిన పత్రాలపై రెవెన్యూ అధికారులకు అనుమానం రావడంతో క్షేత్రస్థాయిలో విచారణ చేపట్టారు. విచారణలో ఇద్దరూ పాకిస్థాన్ పౌరులని, చెల్లుబాటు అయ్యే భారత పౌరసత్వం లేదని అధికారులు గుర్తించారు.
ప్రాథమిక సమాచారం ప్రకారం, ఫర్హానాజ్ 2003లో దాసగరిపల్లికి చెందిన మహమ్మద్ అయూబ్ ఖాన్ను వివాహం చేసుకుని భారత్కు వచ్చింది. అనంతరం వీసా గడువు ముగిసినప్పటికీ దేశం విడిచి వెళ్లకుండా ఇక్కడే నివసించినట్లు వెల్లడైంది. ఈ క్రమంలో నకిలీ ఆధార్ కార్డు, ఇతర గుర్తింపు పత్రాలు, బ్యాంకు ఖాతాలు కూడా పొందినట్లు దర్యాప్తులో బయటపడింది.
ఈ ఘటనపై పోలీసులు కేసు నమోదు చేసి తల్లి, కుమారుడిని అరెస్టు చేశారు. నకిలీ పత్రాల సృష్టి, జారీ ప్రక్రియలో మరెవరైనా సహకరించారా అనే కోణంలో కూడా దర్యాప్తు కొనసాగుతోంది.
-మీకోసం న్యూస్
0 కామెంట్లు