అక్రమ రవాణాకు పాల్పడితే కఠిన చర్యలు తప్పవు: ఎఫ్ఆర్ఓ గుర్రప్ప
కదిరి, ఆగస్టు 11 (మీకోసం న్యూస్): ఎర్రచందనం అక్రమ రవాణాపై అటవీశాఖ అధికారులు ఉక్కుపాదం మోపుతున్నారు. కడప జిల్లా నుంచి బెంగళూరుకు అక్రమంగా ఎర్రచందనం దుంగలను తరలిస్తున్న ఇన్నోవా వాహనాన్ని శ్రీ సత్యసాయి జిల్లా తలుపుల మండలం పెద్దన్నవారిపల్లి సమీపంలోని కోలేకనుమ వద్ద అటవీశాఖ అధికారులు పట్టుకున్నారు. ఈ ఘటనలో ఒక వ్యక్తిని అరెస్టు చేయగా.. మరో ఇద్దరు పరారయ్యారు. ఎర్రచందనం దుంగలతో పాటు ఇన్నోవా వాహనాన్ని అధికారులు స్వాధీనం చేసుకున్నారు.
అధికారుల వివరాల ప్రకారం.. ఆదివారం సాయంత్రం సుమారు 5 గంటల సమయంలో కోలేకనుమ ప్రాంతంలో అటవీశాఖ సిబ్బంది తనిఖీలు నిర్వహిస్తున్నారు. ఈ క్రమంలో అనుమానాస్పదంగా వెళ్తున్న ఇన్నోవా వాహనం కనిపించడంతో అధికారులు ఆపేందుకు ప్రయత్నించారు. వాహనం కొంతదూరం వెళ్లిన అనంతరం ముగ్గురు వ్యక్తులు దాన్ని నిలిపి అక్కడి నుంచి పరారయ్యేందుకు ప్రయత్నించారు.
అప్రమత్తమైన అటవీశాఖ సిబ్బంది వారిని వెంబడించగా ఒక వ్యక్తి పట్టుబడ్డాడు. పట్టుబడిన వ్యక్తిని కడప జిల్లా బ్రహ్మంగారిమఠం మండలం లింగాలదిన్నె గ్రామానికి చెందిన లింగాలదిన్నె బంగారురెడ్డిగా గుర్తించారు. పరారైన ఇద్దరు మైదుకూరుకు చెందిన కృష్ణయ్య, వెంకటేశ్వర్లుగా బంగారురెడ్డి తెలిపినట్లు అటవీశాఖ అధికారులు వెల్లడించారు.
ఇన్నోవా వాహనం స్వాధీనం
ఎర్రచందనం దుంగలను తరలిస్తున్న ఇన్నోవా వాహనాన్ని అటవీశాఖ అధికారులు స్వాధీనం చేసుకున్నారు. వాహనంతో పాటు పట్టుబడిన నిందితుడిని కదిరి అటవీ క్షేత్రాధికారి కార్యాలయానికి తరలించి కేసు నమోదు చేసి దర్యాప్తు చేపట్టారు. పరారైన మరో ఇద్దరి కోసం గాలింపు చర్యలు చేపట్టినట్లు అధికారులు తెలిపారు.
అనంతరం అరెస్టు చేసిన నిందితుడిని తిరుపతి ఎర్రచందనం కోర్టు మేజిస్ట్రేట్ ఎదుట హాజరుపరిచారు. న్యాయస్థానం రిమాండ్ విధించడంతో నిందితుడిని కడప జైలుకు తరలించినట్లు అటవీశాఖ అధికారులు తెలిపారు.
అక్రమ రవాణాదారులకు హెచ్చరిక
ఎర్రచందనం అక్రమ రవాణాకు పాల్పడే వారిపై కఠిన చర్యలు తప్పవని కదిరి ఫారెస్ట్ రేంజ్ ఆఫీసర్ గుర్రప్ప హెచ్చరించారు. అడవుల్లో అక్రమ రవాణా, వన్యప్రాణుల వేట తదితర కార్యకలాపాలపై నిరంతరం నిఘా కొనసాగిస్తున్నామని తెలిపారు.
అటవీ సంపదను పరిరక్షించేందుకు అటవీశాఖ సిబ్బంది అప్రమత్తంగా విధులు నిర్వహిస్తున్నారని పేర్కొన్నారు. ఎర్రచందనం తరలింపు, అక్రమ నరికివేతకు పాల్పడే వారిపై చట్టపరంగా కఠిన చర్యలు తీసుకుంటామని స్పష్టం చేశారు.
అటవీ ప్రాంతాల్లో అనుమానాస్పద కార్యకలాపాలు కనిపిస్తే అటవీశాఖ అధికారులకు సమాచారం అందించాలని ప్రజలకు సూచించారు.
ఈ దాడిలో ఫారెస్ట్ సెక్షన్ ఆఫీసర్ ఎస్. బ్రహ్మయ్య, ఫారెస్ట్ బీట్ ఆఫీసర్లు బి. నరసింహమూర్తి, ఆర్. స్రవంతి తదితరులు పాల్గొన్నారు. ఎర్రచందనం అక్రమ రవాణాను అడ్డుకునేందుకు తనిఖీలు, గస్తీ మరింత ముమ్మరం చేస్తామని అటవీశాఖ అధికారులు తెలిపారు.
0 కామెంట్లు