ఈవీ ఆర్టీసీ బస్సులను ప్రభుత్వమే నడపాలి: ఎమ్మెల్యేకు ఆర్టీసీ జేఏసీ వినతి
పుట్టపర్తి, జూలై 20 (మీకోసం న్యూస్): రాష్ట్రంలో మూసివేసిన ఆర్టీసీ డిపోలను తిరిగి ప్రారంభించాలని, కొత్తగా ప్రవేశపెడుతున్న ఈవీ (ఎలక్ట్రిక్) ఆర్టీసీ బస్సులను ప్రైవేటు సంస్థలకు అప్పగించకుండా ప్రభుత్వమే నేరుగా నిర్వహించాలని కోరుతూ సత్యసాయి జిల్లా పుట్టపర్తి ఆర్టీసీ జేఏసీ నాయకులు పుట్టపర్తి ఎమ్మెల్యే పల్లె సింధూర రెడ్డి, మాజీ మంత్రి డాక్టర్ పల్లె రఘునాథ్ రెడ్డిలకు వినతిపత్రం అందజేశారు.
సోమవారం పుట్టపర్తి ఎమ్మెల్యే క్యాంపు కార్యాలయంలో వారిని మర్యాదపూర్వకంగా కలిసిన జేఏసీ నాయకులు, ఆర్టీసీ ఉద్యోగులు ఎదుర్కొంటున్న సమస్యలను వివరించారు. గతంలో మూసివేసిన డిపోలను పునరుద్ధరిస్తే ప్రజలకు మెరుగైన రవాణా సేవలు అందడమే కాకుండా స్థానికంగా ఉపాధి అవకాశాలు కూడా పెరుగుతాయని పేర్కొన్నారు.
రాష్ట్రంలో ప్రవేశపెడుతున్న ఈవీ ఆర్టీసీ బస్సులను ప్రైవేటు సంస్థలకు అప్పగించే విధానాన్ని పునఃపరిశీలించి, ప్రభుత్వ ఆధ్వర్యంలోనే నిర్వహించేలా చర్యలు తీసుకోవాలని కోరారు.
వినతిని శ్రద్ధగా ఆలకించిన ఎమ్మెల్యే పల్లె సింధూర రెడ్డి, మాజీ మంత్రి డాక్టర్ పల్లె రఘునాథ్ రెడ్డి ఆర్టీసీ ఉద్యోగుల సమస్యలను ప్రభుత్వం దృష్టికి తీసుకెళ్లి, పరిష్కారానికి కృషి చేస్తామని హామీ ఇచ్చారు.
===================================
జేఏసీ ప్రధాన డిమాండ్లు
రాష్ట్రంలోని మూసివేసిన ఆర్టీసీ డిపోలను వెంటనే పునరుద్ధరించాలి.
ఈవీ ఆర్టీసీ బస్సులను ప్రైవేటుకు కాకుండా ప్రభుత్వమే నిర్వహించాలి.
ఆర్టీసీ ఉద్యోగుల సమస్యలను ప్రభుత్వం తక్షణమే పరిష్కరించాలి.
పాల్గొన్న వారు
ఈ కార్యక్రమంలో ఆర్టీసీ జేఏసీ నాయకులు శ్రీరాములు నాయక్, షబ్బీర్, శ్రీనివాసులు, శివశంకర్, ముత్యాలప్ప, గంగులయ్య, సాదిక్ పీరా, అప్పిరెడ్డి, పెద్దన్న వెంకటప్రసాద్, కిష్టప్ప, మోహన్ తదితర ఆర్టీసీ ఉద్యోగులు, ప్రజాప్రతినిధులు పాల్గొన్నారు.
===================================
— మీకోసం న్యూస్
0 కామెంట్లు