ముంబై, మీకోసం న్యూస్: క్రికెట్ దిగ్గజం సచిన్ టెండూల్కర్ మరోసారి తన నిరాడంబర జీవనశైలితో అభిమానుల మనసు గెలుచుకున్నాడు. ప్రతిరోజూ ఉదయం తాగే గ్రీన్ టీని ఎన్నో ఏళ్లుగా తానే స్వయంగా తయారు చేసుకుంటున్నానని వెల్లడిస్తూ ఇన్స్టాగ్రామ్లో పోస్ట్ చేసిన వీడియో ప్రస్తుతం సోషల్ మీడియాలో వైరల్ అవుతోంది.
వీడియోలో సచిన్ కెటిల్లోని వేడి నీటిని కప్పులో పోసి, టీ బ్యాగ్తో గ్రీన్ టీ తయారు చేసుకుంటూ కనిపించాడు. ఈ సందర్భంగా ఆయన మాట్లాడుతూ.. "ప్రతి ఉదయం నా టీ నేనే చేసుకుంటాను. నేను క్రికెట్ ఆడిన రోజుల్లో కూడా ఇదే అలవాటు. నా గదిలో టీ నేనే పెట్టుకునేవాడిని. ఎవరైనా వచ్చి 'సర్.. మీ టీ రెడీ' అని చెప్పడం నాకు ఇష్టం ఉండేది కాదు. నా పనులు నేనే చేసుకోవడం వల్ల ప్రశాంతత, ఏకాగ్రత లభిస్తుంది" అని తెలిపారు.
మ్యాచ్లకు ముందు తన గదిలోకి ఎవరూ రాకూడదని కోరుకునేవాడినని, ఆ సమయాన్ని పూర్తిగా ఆటకు మానసికంగా సిద్ధమయ్యేందుకు వినియోగించుకునేవాడినని చెప్పారు.
ఈ వీడియోకు "చాలా మందికి తెలియని విషయం ఏంటంటే.. నా ఎన్నో ఇన్నింగ్స్లలో ఈ కప్పు టీ కూడా భాగమైంది" అంటూ సచిన్ ఆసక్తికరమైన క్యాప్షన్ జత చేశారు. దీనిపై అభిమానులు ప్రశంసలు కురిపిస్తూ.. క్రమశిక్షణ, స్వీయ నియంత్రణ, చిన్న చిన్న అలవాట్లే సచిన్ను 100 అంతర్జాతీయ సెంచరీలు సాధించిన మహానటుడిగా నిలబెట్టాయని కామెంట్లు చేస్తున్నారు.
– మీకోసం న్యూస్
0 కామెంట్లు