దళితుల సమస్యల పరిష్కారానికి కలెక్టరేట్‌ ధర్నా

ఈనెల 24న నిర్వహించే ధర్నాను జయప్రదం చేయాలి: సీఐటీయూ రాష్ట్ర ఉపాధ్యక్షులు ఓబులు

మీకోసం న్యూస్,అనంతపురం జిల్లా  ఆగష్టు 20 : జిల్లావ్యాప్తంగా దళితులు ఎదుర్కొంటున్న సామాజిక, మౌలిక సమస్యల పరిష్కారం కోసం ఈనెల 24వ తేదీన నిర్వహించనున్న కలెక్టరేట్‌ ధర్నాను జయప్రదం చేయాలని సీఐటీయూ రాష్ట్ర ఉపాధ్యక్షులు ఓబులు పిలుపునిచ్చారు. దళితుల సమస్యలను ప్రభుత్వం తక్షణమే పరిష్కరించి, సామాజిక న్యాయం అందేలా చర్యలు తీసుకోవాలని ఆయన డిమాండ్‌ చేశారు.

సామాజిక శంఖారావం కార్యక్రమంలో భాగంగా సీఐటీయూ, కేవీపీఎస్‌, వ్యవసాయ కార్మిక సంఘాల ఆధ్వర్యంలో జిల్లాలోని దళితవాడల్లో అధ్యయన యాత్రలు చేపడుతున్నట్లు ఓబులు తెలిపారు. దళితులు ఎదుర్కొంటున్న సామాజిక సమస్యలు, మౌలిక వసతుల కొరత, స్మశాన వాటికలు, తాగునీరు, విద్య, వైద్యం, ఉద్యోగం, ఉపాధి తదితర అంశాలను క్షేత్రస్థాయిలో పరిశీలించేందుకు ప్రజా సంఘాల ప్రతినిధులు ఆయా ప్రాంతాల్లో పర్యటిస్తున్నారని చెప్పారు.

అందులో భాగంగా గురువారం గాండ్లపెంట మండలంలోని సోమయాజులపల్లి, కటారుపల్లి, తనకల్లు మండలంలోని ఈతోడు హరిజనవాడ ప్రాంతాల్లో ప్రజా సంఘాల ప్రతినిధుల బృందం పర్యటించింది. ఈ సందర్భంగా ఆయా దళితవాడల్లో నెలకొన్న సమస్యలను ప్రజలను అడిగి తెలుసుకున్నారు.

అధ్యయన యాత్రలో భాగంగా పరిశీలించిన ప్రాంతాల్లో ప్రధానంగా తాగునీటి సమస్య తీవ్రంగా ఉందని ఓబులు తెలిపారు. అనేక దళితవాడల్లో ప్రజలు కనీస మంచినీటి సౌకర్యం కోసం ఇబ్బందులు పడుతున్నారని పేర్కొన్నారు. రోడ్లు, వీధి దీపాలు, మరుగుదొడ్లు, సొంత ఇళ్లు వంటి కనీస మౌలిక వసతులు కూడా అందని దళితవాడలు జిల్లాలో అనేకం ఉన్నాయని ఆవేదన వ్యక్తం చేశారు.

దళితులు మరణించినప్పుడు గౌరవప్రదంగా అంత్యక్రియలు నిర్వహించేందుకు అవసరమైన స్మశాన వాటికలు కూడా అనేక గ్రామాల్లో లేకపోవడం దారుణమని ఓబులు అన్నారు. కొన్ని ప్రాంతాల్లో స్మశాన స్థలాలు లేకపోవడంతో కొండలు, గుట్టల్లో మృతదేహాలను పూడ్చాల్సిన పరిస్థితి నెలకొంటోందని ఆవేదన వ్యక్తం చేశారు. స్మశాన వాటికలు ఉన్నచోట్లకు కూడా సరైన రహదారి సౌకర్యం లేక ప్రజలు ఇబ్బందులు పడుతున్నారని తెలిపారు.

నేటికీ సమాజంలో అనేక రూపాల్లో కుల వివక్ష కొనసాగుతోందని ఓబులు ఆరోపించారు. దళితవాడలు అభివృద్ధికి ఆమడ దూరంలో ఉన్నాయని, ప్రభుత్వాలు సామాజిక న్యాయం గురించి మాట్లాడుతున్నప్పటికీ క్షేత్రస్థాయిలో పరిస్థితులు అందుకు భిన్నంగా ఉన్నాయని అన్నారు. దళితుల జీవన ప్రమాణాలు మెరుగుపడాలంటే ప్రభుత్వం ప్రత్యేక దృష్టి సారించాలని కోరారు.

జస్టిస్‌ పున్నయ్య కమిషన్‌, కోనేరు రంగారావు కమిషన్‌ చేసిన సిఫారసులను అమలు చేయాలని ఆయన డిమాండ్‌ చేశారు. జీవో 1235 ప్రకారం జిల్లాలోని అన్ని దళితవాడలకు స్మశాన వాటికల కోసం స్థలాలను కేటాయించాలని కోరారు. డప్పు, చర్మ కార్మికులకు గుర్తింపు కార్డులు అందించి, వయసు మీదపడిన వారికి పెన్షన్‌ సౌకర్యం కల్పించాలని ప్రభుత్వాన్ని కోరారు.

దళితుల సమస్యను కేవలం ఒక కులానికి సంబంధించిన సమస్యగా చూడకూడదని, ఇది మొత్తం సమాజానికి సంబంధించిన సామాజిక సమస్య అని ఓబులు పేర్కొన్నారు. సామాజిక న్యాయం, సమానత్వం, అభివృద్ధిని కోరుకునే ప్రతి ఒక్కరూ సామాజిక శంఖారావం కార్యక్రమానికి మద్దతు ఇవ్వాలని విజ్ఞప్తి చేశారు.

జిల్లాలోని దళితులు, ప్రజాసంఘాలు, సామాజికవేత్తలు పెద్ద సంఖ్యలో పాల్గొని ఈనెల 24న నిర్వహించే కలెక్టరేట్‌ ధర్నాను విజయవంతం చేయాలని పిలుపునిచ్చారు.

ఈ కార్యక్రమంలో సీఐటీయూ జిల్లా ప్రధాన కార్యదర్శి జి.ఎల్‌. నరసింహులు, నాయకులు సాంబ, బాబ్‌జాన్‌, ముస్తాక్‌, జగన్‌, రమేష్‌ తదితరులు పాల్గొన్నారు.