మీకోసం న్యూస్ I పెనుకొండ
పెనుకొండ మండలం గొల్లపల్లి రిజర్వాయర్ సమీపంలోని పురాతన పుణ్యక్షేత్రానికి రహదారి, మౌలిక సదుపాయాలు కల్పించాలని భక్తుల విజ్ఞప్తి
పెనుకొండ, జూలై 11 (మీకోసం న్యూస్):
పెనుకొండ మండలం గొల్లపల్లి రిజర్వాయర్ సమీపంలో వెలసిన శ్రీ కనుమ వీరాంజనేయస్వామి దేవస్థానం సుమారు 300 సంవత్సరాలకు పైబడిన చారిత్రక, ఆధ్యాత్మిక పుణ్యక్షేత్రంగా ప్రసిద్ధి చెందింది. ప్రకృతి ఒడిలో కొలువై ఉన్న ఈ ఆలయం గంటల మారెమ్మ దేవస్థానానికి సమీపంలో ఉండి భక్తుల విశ్వాసానికి నిలయంగా నిలుస్తోంది.
ఈ ఆలయంలో నిత్యం ప్రత్యేక పూజలు జరుగుతుండగా, ప్రతి ఏడాది ఏకాదశి సందర్భంగా అత్యంత వైభవంగా బ్రహ్మోత్సవాలు, ప్రత్యేక పూజలు, ఆధ్యాత్మిక కార్యక్రమాలు నిర్వహిస్తారు. ఈ ఉత్సవాలకు జిల్లాలోని వివిధ ప్రాంతాల నుంచి వేలాది మంది భక్తులు తరలివచ్చి స్వామివారి దర్శనం చేసుకుని ఆశీస్సులు పొందుతుంటారు.
అయితే, ఇంతటి చారిత్రక ప్రాధాన్యం కలిగిన ఈ ఆలయానికి వెళ్లే రహదారి దయనీయ స్థితిలో ఉండటం వల్ల భక్తులు తీవ్ర ఇబ్బందులు పడుతున్నారు. ముఖ్యంగా వర్షాకాలంలో ఆలయానికి చేరుకోవడం కష్టసాధ్యంగా మారుతోంది. అదేవిధంగా తాగునీరు, విద్యుత్ వెలుగులు, పార్కింగ్, విశ్రాంతి సదుపాయాలు వంటి మౌలిక వసతులను కూడా అభివృద్ధి చేయాల్సిన అవసరం ఉందని స్థానికులు పేర్కొంటున్నారు.
దేవాదాయ శాఖ అధికారులు, ప్రజాప్రతినిధులు, దాతలు స్పందించి ఈ 300 ఏళ్ల పురాతన పుణ్యక్షేత్రాన్ని అభివృద్ధి చేసి, ఆలయానికి సరైన రహదారి నిర్మించి భక్తులకు మెరుగైన సౌకర్యాలు కల్పించాలని స్థానికులు, భక్తులు విజ్ఞప్తి చేస్తున్నారు.
"శ్రీ కనుమ వీరాంజనేయస్వామి సేవలో భాగస్వాములు అవ్వండి... ఆలయ అభివృద్ధికి మీ వంతు సహకారం అందించి స్వామివారి కృపకు పాత్రులు కండి" అని భక్తులు పిలుపునిస్తున్నారు.
— మీకోసం NEWS
0 కామెంట్లు