తెరపై తాము పండించిన ఎన్నో భావోద్వేగాలకు జానకమ్మ గాత్రమే ప్రాణం పోసిందని, ఆమె అసాధారణ కళాకారిణి అని చిరంజీవి కొనియాడారు. తన సినీ ప్రయాణంలో ప్రేక్షకుల హృదయాలను గెలుచుకున్న ఎన్నో మధుర గీతాలకు జానకమ్మ తన అపూర్వ స్వరాన్ని అందించారని గుర్తుచేశారు. ఆ పాటలు వినిపించిన ప్రతిసారీ ఆ జ్ఞాపకాలు సజీవంగా కళ్లముందు నిలుస్తాయని పేర్కొన్నారు.
జానకమ్మ కేవలం గాయని మాత్రమే కాదని, భావాలను స్వరంగా మలిచిన మహోన్నత కళాకారిణి అని చిరంజీవి అన్నారు. ఆమె ఆలపించిన ప్రతి పాట ఒక జ్ఞాపకం, ఒక అనుభూతి, జీవితాంతం గుర్తుండిపోయే అనుబంధమని పేర్కొన్నారు. నేడు సంగీత ప్రపంచం ఒక మహోన్నత శిఖరాన్ని కోల్పోయిందని, అయితే ఆమె గానం రాబోయే తరాలకు స్ఫూర్తిగా, మన జీవితాలకు నేపథ్య సంగీతంగా చిరకాలం మార్మోగుతూనే ఉంటుందని అన్నారు.
ఎస్. జానకి కుటుంబ సభ్యులకు, ఆత్మీయులకు, ఆమెను అభిమానించే కోట్లాది మంది సంగీతాభిమానులకు తన ప్రగాఢ సానుభూతి తెలియజేస్తూ.. "జానకమ్మ గారు.. మీ స్వరం ఎప్పటికీ అమరం.. ఓం శాంతి" అంటూ చిరంజీవి తన నివాళిని ముగించారు.
0 కామెంట్లు