నీట్ రద్దే పరిష్కారం.. విద్యార్థుల పోరాటానికి స్టాలిన్ మద్దతు

న్యూఢిల్లీ: దేశ రాజధాని ఢిల్లీలోని జంతర్ మంతర్ వద్ద ‘నీట్’ పరీక్షకు వ్యతిరేకంగా ఆందోళన చేస్తున్న విద్యార్థులకు తమిళనాడు మాజీ ముఖ్యమంత్రి, డీఎంకే అధ్యక్షుడు ఎం.కే. స్టాలిన్ బహిరంగ మద్దతు ప్రకటించారు. ‘ఎక్స్’ వేదికగా స్పందించిన ఆయన, లక్షలాది మంది విద్యార్థుల భవిష్యత్తును అనిశ్చితిలోకి నెట్టేస్తున్న నీట్ పరీక్షను పూర్తిగా రద్దు చేయాలని కేంద్ర ప్రభుత్వాన్ని డిమాండ్ చేశారు.

నీట్‌ను ప్రవేశపెట్టినప్పుడు చెప్పిన సమాన అవకాశాలు, పారదర్శకత, నాణ్యమైన విద్య వంటి లక్ష్యాలు నెరవేరలేదని స్టాలిన్ విమర్శించారు. పాఠశాల విద్యా వ్యవస్థను బలహీనపరుస్తూ, కార్పొరేట్ కోచింగ్ సెంటర్ల ఆధిపత్యాన్ని పెంచే విధంగా ఈ విధానం మారిందని ఆరోపించారు.

గ్రామీణ, పేద, వెనుకబడిన వర్గాలకు చెందిన విద్యార్థుల వైద్య విద్య కలలను నీట్ దెబ్బతీస్తోందని ఆయన పేర్కొన్నారు. సామాజిక న్యాయం, రాష్ట్రాల విద్యా హక్కులను పరిరక్షించాలంటే నీట్ రద్దు తప్పనిసరి అని స్పష్టం చేశారు.

విద్యార్థుల ఆందోళనను కేంద్ర ప్రభుత్వం సీరియస్‌గా తీసుకుని, తన వైఖరిని మార్చుకోవాలని స్టాలిన్ కోరారు. "Ban NEET, Save Students" నినాదంతో విద్యార్థుల తరఫున తమ పోరాటం కొనసాగుతుందని వెల్లడించారు.

— మీకోసం న్యూస్