పెనుకొండ, జూలై 22 (మీకోసం): దేశవ్యాప్తంగా నీట్ (NEET) ప్రవేశ పరీక్ష ప్రశ్నాపత్రం లీకేజ్ ఘటనపై నిరసనగా ఈ నెల 24న నిర్వహించనున్న రాష్ట్రవ్యాప్త విద్యాసంస్థల బంద్ను విజయవంతం చేయాలని ఐక్య విద్యార్థి సంఘాల నాయకులు పిలుపునిచ్చారు.
ఈ సందర్భంగా నాయకులు నరసింహమూర్తి, బాబావలి, భారత్, కమల్ భాషా, వీరేష్, బద్రి, నాగేంద్ర మాట్లాడుతూ, నీట్ ప్రశ్నాపత్రం లీకేజ్ కారణంగా లక్షలాది మంది విద్యార్థుల భవిష్యత్తు ప్రశ్నార్థకంగా మారిందన్నారు. సంవత్సరాల పాటు కష్టపడి చదివిన విద్యార్థుల శ్రమను నీరుగార్చేలా జరిగిన ఈ ఘటన విద్యా వ్యవస్థపై నమ్మకాన్ని దెబ్బతీసిందని ఆవేదన వ్యక్తం చేశారు.
ఈ ఘటనకు నైతిక బాధ్యత వహిస్తూ కేంద్ర విద్యాశాఖ మంత్రి రాజీనామా చేయాలని, ప్రశ్నాపత్రం లీకేజీకి బాధ్యులపై వేగవంతమైన, కఠిన చర్యలు తీసుకోవాలని డిమాండ్ చేశారు. పరీక్షల నిర్వహణలో పూర్తి పారదర్శకతను తీసుకురావడంతో పాటు భవిష్యత్తులో ఇలాంటి ఘటనలు పునరావృతం కాకుండా పటిష్ట భద్రతా చర్యలు చేపట్టాలని కోరారు.
విద్యార్థుల భవిష్యత్తు, న్యాయమైన విద్యా వ్యవస్థ పరిరక్షణ లక్ష్యంగా ఈ నెల 24న నిర్వహించే విద్యాసంస్థల బంద్కు విద్యార్థులు, యువత, తల్లిదండ్రులు, అధ్యాపకులు మద్దతు తెలిపి విజయవంతం చేయాలని విజ్ఞప్తి చేశారు. ప్రతి విద్యార్థి ప్రశాంతంగా, క్రమశిక్షణతో బంద్లో పాల్గొని తమ నిరసనను ప్రజాస్వామ్యబద్ధంగా తెలియజేయాలని పిలుపునిచ్చారు.
ఈ కార్యక్రమంలో మహేష్, ఆకాష్, నందిష్, అనిల్, పవన్, సందీప్ తదితర విద్యార్థి సంఘాల నాయకులు పాల్గొన్నారు.
0 కామెంట్లు