ప్రొద్దుటూరు, జూలై 15 (మీకోసం న్యూస్): గత వైసీపీ ప్రభుత్వంలో చంద్రబాబు నాయుడిని ఇంటి నుంచి బయటకు రానీయకుండా అడ్డుకున్నారని, అయితే ప్రస్తుతం జగన్ మోహన్ రెడ్డికి ఎక్కడికైనా స్వేచ్ఛగా వెళ్లే అవకాశం కల్పిస్తున్నామని మంత్రి, టీడీపీ జాతీయ వర్కింగ్ ప్రెసిడెంట్ నారా లోకేశ్ అన్నారు. ప్రొద్దుటూరులో నిర్వహించిన టీడీపీ కార్యకర్తల సమావేశంలో ఆయన మాట్లాడారు.
వైసీపీ ప్రభుత్వంపై తీవ్ర విమర్శలు చేసిన లోకేశ్.. జగన్ రాయలసీమకు అభివృద్ధి చేయలేదని ఆరోపించారు. బ్రాహ్మణి స్టీల్స్ పేరుతో భూములు సేకరించి పరిశ్రమ ఏర్పాటు చేయలేదని, ఓబులాపురం గనుల వ్యవహారాన్ని ప్రస్తావిస్తూ సాక్షి మీడియాపై కూడా విమర్శలు చేశారు.
రాయలసీమలో తమ ప్రభుత్వం పరిశ్రమలు తీసుకొస్తోందని, జేఎస్డబ్ల్యూ స్టీల్ ప్లాంట్, ఎస్ఏఈఎల్ ఎనర్జీ ప్లాంట్ వంటి ప్రాజెక్టులు ఉద్యోగావకాశాలు కల్పిస్తాయని తెలిపారు. ఫ్యాక్షన్ రాజకీయాలకు బదులుగా అభివృద్ధి, పరిశ్రమలే తమ లక్ష్యమని స్పష్టం చేశారు.
వైసీపీ హయాంలో హత్యకు గురైన టీడీపీ నేత నందం సుబ్బయ్య కుటుంబానికి అండగా నిలిచామని, వారి పిల్లలను ఎన్టీఆర్ ట్రస్ట్ విద్యాసంస్థల్లో చదివిస్తున్నామని చెప్పారు. ఆర్థిక ఇబ్బందులు ఉన్నప్పటికీ సంక్షేమ పథకాలను కొనసాగిస్తున్నామని పేర్కొన్నారు.
ఈ నెల 24న రెండో విడత 'తల్లికి వందనం' నిధులు విడుదల చేయనున్నట్లు లోకేశ్ వెల్లడించారు. రూ.4,000 పెన్షన్, మహిళలకు ఉచిత బస్సు ప్రయాణం, ఏడాదికి మూడు గ్యాస్ సిలిండర్లు వంటి హామీలను అమలు చేస్తున్నామని తెలిపారు. విద్యుత్ ఛార్జీల తగ్గింపు, చెత్త పన్ను రద్దు వంటి నిర్ణయాలను కూడా గుర్తు చేశారు.
కష్టకాలంలో పార్టీ జెండాను నిలబెట్టిన కార్యకర్తల సేవలు మరువలేమని, కష్టపడి పనిచేసే ప్రతి కార్యకర్తకు పార్టీలో తగిన గుర్తింపు కల్పిస్తామని లోకేశ్ హామీ ఇచ్చారు. నాయకులు వర్గాలను పక్కనపెట్టి సమన్వయంతో పనిచేయాలని పిలుపునిచ్చారు. కార్యక్రమంలో మంత్రి సవిత, పార్లమెంటు పార్టీ అధ్యక్షుడు భూపేష్ రెడ్డి, ఎమ్మెల్యే వరదరాజులు రెడ్డి తదితరులు పాల్గొన్నారు.
0 కామెంట్లు