హైదరాబాద్, జూలై 16 (మీకోసం న్యూస్): ప్రముఖ పారిశ్రామికవేత్త గల్లా జయదేవ్ కుటుంబంలో పెళ్లి సందడి ప్రారంభమైంది. టాలీవుడ్ సూపర్ స్టార్ మహేశ్ బాబు సోదరి పద్మావతి, గల్లా జయదేవ్ల చిన్న కుమారుడు గల్లా సిద్ధార్థ్ నిశ్చితార్థం దక్షిణ కొరియాకు చెందిన హైన్ కిమ్తో కుటుంబ సభ్యులు, అత్యంత సన్నిహితుల సమక్షంలో ఘనంగా జరిగింది. త్వరలో ఇటలీలో వీరి వివాహం జరగనున్నట్లు సమాచారం.
హైన్ కిమ్కు ఫిట్నెస్, రన్నింగ్, ట్రావెలింగ్ అంటే ప్రత్యేక ఆసక్తి. ప్రపంచంలోని పలు దేశాలతో పాటు హైదరాబాద్, గోవా వంటి భారతీయ పర్యాటక ప్రాంతాలను కూడా ఆమె సందర్శించారు. సోషల్ మీడియాలో ఎక్కువగా లైమ్లైట్కు దూరంగా ఉండే హైన్ కిమ్, సిద్ధార్థ్తో ఉన్న ఫొటోలను అప్పుడప్పుడు మాత్రమే పంచుకుంటుంటారు.
సిద్ధార్థ్తో కలిసి కొత్త ప్రాంతాలు సందర్శించడం, విభిన్న వంటకాలను ఆస్వాదించడం ఆమెకు ఇష్టమైన హాబీలు. కుటుంబ సభ్యులతోనూ ఆమెకు సన్నిహిత అనుబంధం ఉంది. గత ఏడాది సింగపూర్ పర్యటన సందర్భంగా సిద్ధార్థ్ కుటుంబంతో కలిసి దిగిన ఫొటోలను కూడా ఆమె సోషల్ మీడియాలో పంచుకున్నారు.
వృత్తిపరంగా హైన్ కిమ్ సర్వీస్ రంగానికి చెందినవారని తెలుస్తోంది. ఆమె వ్యక్తిత్వం స్నేహపూర్వకంగా, సరదాగా ఉంటుందని కుటుంబ సభ్యులు చెబుతున్నారు.
ఈ సందర్భంగా మహేశ్ బాబు సతీమణి నమ్రత శిరోద్కర్ నిశ్చితార్థ వేడుక ఫొటోలను సోషల్ మీడియాలో పంచుకుంటూ, "ఈ అందమైన జంటకు హృదయపూర్వక శుభాకాంక్షలు. మీ జీవితంలో ఈ కొత్త అధ్యాయం ఆనందం, మధుర జ్ఞాపకాలతో నిండిపోవాలని కోరుకుంటున్నాను" అని శుభాకాంక్షలు తెలిపారు.
కాగా, సిద్ధార్థ్ అన్న అశోక్ గల్లా సినీ రంగంలో హీరోగా కొనసాగుతుండగా, సిద్ధార్థ్ వ్యాపార రంగంలో తన ప్రస్థానాన్ని కొనసాగిస్తున్నారు. ఈ అంతర్జాతీయ ప్రేమకథకు ఇరు కుటుంబాలు అంగీకారం తెలపడంతో, త్వరలో వివాహ వేడుకకు ఏర్పాట్లు జరుగుతున్నాయి.
0 కామెంట్లు